Aufm Christkindlmarkt
Liachtln spiagln in de Augn,
de ganz groß und freudig schaugn,
und sie suachan hin und her,
wos woi ois zum Finden wär?
Christbaumkerzn, bunte Kugeln,
Holzschnitzwerk und warme Nudln,
Lebkuacha und hoaßa Punsch,
ois is do, für jedn Wunsch.
Weihnachtsguaddl und aa Stolln,
Zinnsoldatn, so vuis grod wolln,
gebrannte Mandln und Maroni,
Plätzerl mit Schoklad und ohne.
Warme Strümpf für koide Tog
ko sich kaffa, wer des mog.
Säck mit Nüss fürn Nikolo
und aa Christbaam biatns o.
Kletznbrot, so saftig guat,
wias scho frühras bacha wurd.
Bratäpfe gibt’s, glei zum Essn,
den Duft alloa werst nia vergessen!
Adventsgesteckte, Rauschgoldengerl ...
host no Zeit, a wengerl?
Na hörsts no musiziern,
a Gruppn, aa wenn’s friern,
spuins schöne Weinachtsliada, -
i hörs zu gern und oiwei wieda!
von Ernst Reiter
Keine Kommentare:
Kommentar veröffentlichen